【號外節目】 白日之下 ｜ VIFF溫哥華電影節 (足本）

讀出Some Choice

讀出Some Choice 號外節目～Rachel 同Joe帶來新鮮滾熱辣嘅影片～溫哥華國際電影節的港產片『白日之下』！ _______ 以下是Joe對電影的感想： 2023年10月7日 星期六 白日之下 1. 今年溫哥華國際電影節揀5套戲睇，今日睇埋最後一套港產片～白日之下。本來順序寫咗兩套影評，不過會將白日之下呢篇貼堂先！ 2. 套戲完場有導演Q&A環節，共有4位觀眾發問，我係最後一個（通常聽吓其他人問乜，有冇撞題，問得夠唔夠質素，而通常係以上皆非，我就會舉手發問）呢段彩蛋我留喺錄音講。 3. 套戲以幾年前轟動一時嘅“劍橋護老院”作為藍本改編，講記者余香凝到“彩橋之家”護老院放蛇，扮係其中一個院友姜大衛嗰孫女，暗中蒐集證據做新聞故仔，揭發護老院院長及職員虐待，性侵院友。故事大家可以上網睇，唔簁大家時間。 4. 先讚套戲好嘅地方。演員選角，造型我覺得相當高質，即使係我呢啲老鬼睇慣姜大衛，胡楓飾演院友都好有說服力，一啲都冇出戲，其他配角例如鮑起靜一貫地好戲，林保怡，陳湛文，飾演弱智女個演員，或一眾只有極少戲份的客串演員都有不俗演出，令成套戲充滿質感。 5. 呢類揭露社會黑暗嘅電影，控訴力量要大，首先係要刻畫角色身處嘅環境有幾惡劣，呢套戲尤其著力批評制度。香港有大量長者，殘疾，弱智人士需要由社署安排照顧，但公營院舍無法應付需求，於是外判俾私人院舍搞，眼不見為乾淨，責任拋咗俾其他人，審批，監督，發牌得過且過，衍生漏洞，助長護老院鑽漏洞搵錢，權力使人腐化，院長職員肆意蹂躪院友，睇死佢地係被社會及家人漠視，孤立無援嘅一群，點褻玩都得。 6. 單睇呢個setup，已經非常明顯地插緊政府對官僚僵化嘅系統躺平，仲有係批評香港一直自豪嘅所謂三權分立，形同虛設。戲中講院長林保怡性侵弱智女被拉，佢仲唔係第一次；差人（司法）冇佢符，檢控官（行政）唔夠料銼，議員（立法）向余香凝解釋，被投訴嘅惡質護老院，最後都安然無恙，係結構性問題～人口老齡化，政府對長者支援不足，護老院供應永遠追不上需求。 7. 好多功能性嘅角色其實已經花咗心思去豐富，不過始終都係有啲臉譜化。譚玉瑛同胡楓兩父女嘅衝突只有一幕，但對塑造胡楓呢個角色好重要，因為佢第二朝就瓜咗，依家冇前文後理，令到胡楓嘅死弱咗好多，間接稍弱佢對姜大衛呢個同房院友嘅影響。 8. 宜家正式講導演Q&A。你通常係個人認為向創作人問問題，就係尊重同貼題（兩者可以係同一樣嘢）。先講一段個人經歷俾大家聽，十幾年前溫哥華請咗一位大陸知名作家蘇童嚟出席座談會。佢最有名一本書叫妻妾成群，張藝謀攞嚟拍咗部大紅燈籠高高掛。佢早期嘅書我睇唔少，當然去個座談會聽吓佢講文學創作心得之類。佢本人講嘅內容我宜家都已經忘記得一乾二淨，有啲失望。到Q&A環節，第一個觀眾問佢大紅燈籠高高掛套戲入面嘅問題，佢禮貌上答，套戲同本小說係唔同嘅，笑笑口叫佢下次自己問張藝謀，答得相當得體。第二個問佢點樣做作家，問點可以寫到好似佢咁。其後陸續發問嘅問題竟然又係大紅燈籠高高掛，做作家有咩條件，蘇童塊面越嚟越黑。。。主持人醒水，收返個咪嚟自己問。 9. 你覺得觀眾問呢啲問題有咩問題？唔尊重作家，同埋離晒題囉！喂，套戲冇搵個作者寫劇本㗎，你起勢問套戲搞咩？作者三番四次強調本書同電影唔一樣，就係話緊你離題啊！至於問人點做作家，就好似問畢加索點畫畫一樣，咪拿起紙筆畫囉！仲有人問蘇童可唔可以介紹出版社俾佢，點樣加入作協，講到好似自己寫咗一本曠世傑作，等緊伯樂嚟求佢出版咁，你有冇理過作家嘅感受？ 10. 一個創作人出席電影節又好，座談會又好，作為觀眾，我認為講嘢厚度少少係必須嘅，就算覺得佢嘅作品幾爛都無需當面鬧人嘅，將心比己啫，就好似電影節套戲完咗，禮貌上拍手掌咁。 11. 假如真係想問問題，唔該聽清楚其他人問乜，注意聽受訪者答乜，不斷重複問同一個問題，係唔尊重受訪者嘅。 12. 試吓代入受訪者角度，公眾嘅提問係可以反映出佢地對作品的喜愛與否及取態，創作人會想知道觀眾對作品嘅睇法。 13. 想聽創作人有深度而精彩嘅分享，你就要問有質素嘅問題。 14. 我經常舉一個例，有人問畢菲特攞股票貼士，以畢菲特嘅地位，足夠資格藐到佢上天花板，不過佢心情靚，答話：佢只有輸錢嘅貼士！呢啲就係低質問題嘅教學級示範。假如俾你有機會問畢菲特一個問題，你會問咩？ 15. 總括嚟講，白日之下係今年為止，最好睇嘅一套港產片，缺點唔係冇，但瑕不掩瑜。很少可有港產片的資料搜集的咁認真（不過當你睇到監製係爾冬陞，又唔會覺得出奇）。搵到好嘅素材，亦要將故事講的深入，才會深化主題，套戲圍繞著老年人晚年，弱勢社群，及其家屬等面對現實殘酷嘅困境，再加上何謂新聞報導作出咗唔少反思及批判，整體無論深度及廣度都有不俗嘅表演。 ____________________________ 🎧想聽我們其他足本內容，請到： https://www.patreon.com/duksomechoice ▶️ 節目將會免費公開兩星期，請支持成為Patreon會員，收聽優先和獨家內容, 以及已存檔的過去內容！ ▶️你亦可在各大podcast平台，Spotify，Apple ，Google，KKbox 搵到我們！