Rodrigo Cuevas, Orgullo e o cachopo colonizado

Café Derby 21

É dificil saber onde remata o amor propio e comeza o egocentrismo. A querencia polo eu pode chegar a ser perigosa pero é algo que debemos facer, máis aínda cando fuximos do establecido ou rachamos con aquelo que chamaron canon e cada día pesa menos. Deste autodescubrimento e proclamación nace o coñecido como orgullo, sentirte e recoñecerte como algo e que levas por bandeira a defender. O bo do orgullo é que se adapta a sentimentos e identidades, a situacións e loitas, pero tamén pode agochar proclamas terribles e baleiras no mellor dos peores casos. O mes de xuño historicamente xa se coñece como o mes do Orgullo LGBT+, como ben recordan as marcas que mudan as súas cores polas do arco da vella. Estamos no momento de mudar tamén isto e deixar as partes malas deste sentimento de orgullo queer, de perder lastre e recuperar figuras ultralocais, loitas das rutinas e causas máis aló do amor. Disto falaremos co axitador folclórico por excelencia: Rodrigo Cuevas. Tamén sobre a relación entre Galicia e Asturias, mitos e lendas dos «primos-hermanos»; onde comer o mellor cachopo, urbanitas polo rural ou recuperar espazos e pobos desde unha óptica máis aberta.